Esklabutzaren garaiak gogoan dituzu? Beltza zara, Afrika ama lurretik indarrez kanporatu zaituzte eta zure borondatearen kontra, indarrez, lur sailean lana egitera behartu zaituzte. 400 urte eta gero, esklabutza indarrean dago eta nahiz eta orain, itxuraz, esklabutza ez dagoen, buruko esklabutza fisikoaren gainetik inposatu da. Clappers diskoetxeak diruaren esklabutzarekin apurtu nahi du eta militantziaren esanahia berreskuratu. Reggae doinuak maite dituzte eta ez dute reggae musika merkantzia modura erabili nahi. Reggaea zabaldu nahi dute eta ez ustiatu. Lehen erreferentzi bezala 1975ean Jamaikako Ocho Rios-eko sound systemetan oihartzun handia izan zuten hainbat single berreskuratu dituzte. Kantuok zuten eduki politikoarengatik zailtasun handiak izan zituzten, diskoetxeek uko egiten ziotelako horrelako kantuak kaleratzeari. Zailtasunak zituzten taldeen artean, Burning Spear abeslariaren anaiaren Elias Rodneyren taldea dago, Arrows izenekoa. Baita Justin Hinds & The Dominoesen abeslaria izandako Tony Thomasen Skulls taldea edota lehen aipatutako Burning Spear-ekin batera abeslari lanetan aritutako Jah Blue Evansen The original Survivors taldea ere. Reggae musikaren alde iluna eta militantea ezagutzeko aukera paregabea.