Chambaoko La Mari kantariaren kolaborazio berezia dakar Esne Beltza taldeak zabaldu duen Behin Eta Berriz single berriak. Euskaraz abesten entzun daiteke La Mari, eta Rafa Sardina arduratu da produkzioaz. Single honetan ez ezik, disko osoaren produkzioan aritu da hainbat Grammy irabazi dituen Rafa Sardina musika ekoizle bermeotarra. Los Angeles eta Euskal Herria artean grabatzen aritu dira taldekideak.
Lehenengo hau ez ezik, lankidetza gehiago eta aniztasun handia iragarri dute Esne Beltzakoek bere hurrengo diskoaz hitz egiterakoan. Mundu osoko artistek parte hartu omen dute Esne Bidea izena eramango duen lan berriaren grabaketan. Taldearen zortzigarren lan luzea izango da. “Soinu-muga berriak esploratzeko gonbidapena” ere izango omen da.
Esne Bidea disko berria, abendu hasierarako, Durangoko Azokarako, izango du prest Xabi Solano buru duen talde gipuzkoarrak.