Su Ta Gar euskal heavy metalaren aitzindariek alarma guztiak piztu eta lan berria iragarri dute berriki, taldearen diskografian estudioko 12.a izango dena: Alarma. Hain justu, Alarma egoera izeneko kantak zabalduko du diskoa, pandemia osteko alarma-egoeran idatziriko pieza.
Zentzu horrenta, diskoa “bizi dugun errealitatearen ispilu zuzena” dela aurreratu dute, kanta xamurrek baina baita pieza indartsuek ere osatzen dutela, eta “erraietatik, bihotzetik” sortu dutela.
Izan ere, urte dezente joan dira Gorosabel eta enparauek aurreko diskoa atera zutenetik eta, aitortu dutenez, kanta oso anitzak idazten saiatu dira; zuku handia atera dakiokeen lana ondu dute, eta zeharo “beste kontzeptu bat” aurreko guztiekin alderatuz gero.
Diskoa azaroaren 28tik aurrera salgai izango dute sutagar.com webgunean, eta abenduaren 6tik aurrera plataforma digital guztietan egongo da, baita Durangoko Azokan taldeak izango duen postuan ere.