2016an eman zuen azken zuzenekoa Euskal Herrian; Lizarran izan zen. Orain, zazpi urteren ondoren, Manu Chaok gurean kontzertua emango duela zabaldu dute.
Arrasateko Mondra n’Roll jaialdiak ekarriko du. Uztailaren 9an, saio akustikoa egingo du Monterron parkean. Sarrerak maiatzaren 30ean jarriko dituzte salgai entzunproducciones.com plataformaren bitartez.
Kartelburu izan arren, Manu Chaorena ez da zuzeneko bakarra izango. Iruñako Burutik taldeak eta Zumaiako Eire bikoteak zabalduko dute gaualdia.
Burutik-ek 2022ko martxoan argitaratu zuen lan luze berria, eta 2023ko otsailean 3 kantaz osaturiko EPa ere kaleratu zuten. Eire bikoa, bestalde, hasiberria da, eta hainbat single kaleratu dituzte aurreko hilabeteetan.