Alhambra Monkey Week musika independentearen jaialdiaren 14. edizioa hartuko du Sevillak azaroaren 24, 25 eta 26an. Nazioarteko hainbeste talde eta artistaren artean, euskal herritarrek eginako musika entzuteko aukera ere izango da. 2022 honetako ordezkariak Magia Bruta eta Maraca Diablo izango dira, hain zuzen.
Euskal Herriko musika kanpoan zabaltzeko helburua duen BASQUE. MUSIC. plataformaren bitartekaritzaz lortu dute Sevillan showcase bana arukezteko sarbidea; musika independentearen egutegian gorriz markaturiko (g)unean.
Ohiko DICE Monkey Week PRO jardunaldi profesionalak ere izango dira Sevillako Santa Clara espazioan. Bertan, hainbat gaien inguruko hitzaldiak, mahai-inguruak, elkarrizketa publikoak, topaketak, networking saioak, koktelak eta profesionalentzako zein artistentzako bestelako proposamenak izango dira.