Bengo - Bakarrik

Sua - Hormak apurtzea

Ekainaren 21a Europa mailako Musikaren Eguna da. Euskal Herriari dagokionez, EHMBE arduratzen da data berezi horren karietara ekitaldia antolatzeaz. Aurtengoa hirugarrena izango da, eta Ondarroako Beikozini Aretoan gertatuko da. 

Bengo eta Sua taldeek emango dute kontzertua eta sarrera doakoa izango da. Aurtengo zuzenekoaren xedea, EHMBE-k azaldu duenez, “talentu berriak potentziatu eta musikari berriei ikusgarritasuna ematea” da.

Aretoko ateak 19:30etan irekiko dira eta ordu erdi geroago, 20:00etan, hasiko da Bengo artistaren kontzertua. Oiartzungo musikariak hip-hopa egiten du. Break dantzaria eta abeslaria da, eta musika munduan sei-zazpi urte daramatzan arren, lehen diskoa 2021ean argitaratu zuen, euskaraz grabatutako 4 Taupada izeneko albuma. Aurten, Bizirik izeneko diskoa kaleratu du.

Ondoren Sua taldearen txanda izango da. 2018an sortu zen lau kidez osaturiko talde bizkaitar hau. Gaztea Irratiko maketa lehiaketa irabazi zuten eta ordutik berezko estiloa jorratzen dihardute.