Anestesia

Osasun arazoek behartuta, Anestesia taldeak 2019an eten behar izan zuen ibilbidea. Gero pandemia etorri zen eta… 2022an behin betiko agur esateko kontzertu-bira bat prestatu zuten: Fenix. Baina hura ere bertan behera utzi behar izan zuten, berriz ere osasun arazoak tarteko.

Baina 35 urteko ibilbideak agur duinagoa behar duela sinesten dute eta, horregatik, zuneko-bira berria iragarri berri dute 2024rako. Aitortu dutenez, ez da erraza izan, batez ere Beloki baxu-jotzailea ordezkatzea “oso zaila” izan delako (urte hasieran erabaki zuen banda uztea). Azkenean, Zarautzen topatu dute haren lekukoa hartuko duena: Albixu; Folk, Core, Humilitate eta Burux Lee taldeetan aritutakoa.

Azken Heriotza izena jarri diote momentuz 5 kontzertu barnebiltzen dituen birari. Apirilan hasi eta ekainean amaituko da. Apirilak 6: Biarritz, Atabal. Apirilak 13: Donostia, Doka. Maiatzak 11: Atarrabia, Totem. Maiatzak 25: Bilbo, Kafe Antzokia. Ekainak 8: Gasteiz, Jimmy Jazz.