Aimar kantariak Amotina izeneko singlea eta dagokion bideoklipa sareratu berri ditu, Baga-Biga Musika Ideiak-en eskutik. Rock intimista jorratu du, “nitasunetik” kantatzeko.
“Gustuko harrian behin eta berriz trabatzen garenean, agian pentsatu behar dugu nahita zangotrabatzen dugula geure burua. Ez gara ari auto mutinatzen. Ez dago trabarik, nahita eta gustura biziko genituzke propio hartutako musika erabakiak, nortasun erabakiak. Harriak harriari ez diolako enbarazurik egiten”. Halaxe dio Amotina abestiaren aukezpen oharrak.
Eguneroko bizitzako kontuei heldu die Aimarrek bere bakarkako ibilbidean. Gernikako Dientes de Luna taldearekin bost disko atera ostean heldu dio etapa berri honi, eta Amotina da bere bigarren singlea.