Boni, ZEN jaialdiko antolatzaileetako bat da. Harekin hitz egin dugu ekimen honi buruz:

Nola sortu zen ZEN? Nor dago hizki horien atzean?
Aurreko urtean sortu zen ZEN eta bertako tabernariek asmatutako ekimena da. Kontzertu batean sortu zen ideia: suertatu zen hiru kantautorek abestu behar zutela zonaldeko hiru taberna desberdinetan; formatu txikiko kontzertuak ziren hasiera batean, baina jende gehiago gehituz joan zen eta espazio berriak ere agertu ziren kontzertuak egiteko prest. Gauzak horrela, Deustuko Iparraldeko zonaldean gauden tabernetara ekimena zabaltzea erabaki genuen, Herriko tabernatik beste muturrera zazpi zortzi taberna daude, pare bat plaza txiki, eta  San Pedro eliza sartzea erabaki genuen baita ere. Parte hartzen duten musika talde guztiak auzokoak dira, bertan musika talde on asko dago, eta bertako taldeekin egitea erabaki genuen. Joselitorekin, lagun batekin, asmatu genuen izena, eta RIP eta Eskorbutoren diskoetatik hartu genuen Zona Especial Norte izena.

Aurreko urtean egin zenuten lehen edizioa eta berriro ere errepikatzen duzue, ondo joan zenaren seinale...
Bai, eta datorren urterako ideia berriak dauzkagu dagoeneko. Aurtengoa aurreko edizioaren antzekoa da, baina datorren urterako pare bat buelta eman nahi diogu.

Giro ona sortzen duzue auzoko alde honetan egun horietan.
Bai, denek egiten dugu bat kalean, zaharrek zein umeek, gazteek eta ez hain gazteek. Egitarauan daude Rat-Zinger taldea eta baita ere Deustuarrak abesbatza. Ez dugu ildo zuzenik, agertu dena eta lan egiteko prest dagoena hartu dugu. Horrela atera da.

Deustuarrentzat?
Noski. Denen artean egin dugu, zerikusirik ez duen jendeak ere lagundu du gustuko duelako, auzoarentzat delako. Deustuko Rotor inprimategiak egin dizkigu karteleria eta sarrerak eta Serigraficos del Abra-k kamisetak betiko lez, Gazte Lokalak... Baina, denek hartzen dugu parte neurri baten edo bestean. 

Dirua irabaztrarren egiten duzue?
Gutxi galtzen da... hori da asmoa behitzat, gutxi galtzea. Oso justu gabiltza aurrekontuekin, baina musikariekin ondo geratzea nahi izan dugu. Apur bat behin behineko egoeran gabiltza, gustatuko litzaiguke aurrekontu handiagoa izatea eta apurka zerbait potenteagoa izatea ZEN.

Zergatik egiten duzue?
Gustuko dugulako! Nik gustura ikusiko nituzkeen taldeak direlako. Pentsa: etengabeko musika eta kontzertuak, doakoak, egunez eta gauez, batez ere egunez, kontzertuen ostean jaitxo bat egiten dugu Gazte Lokalean edota Atxuri tabernan, bertako dj-rekin, Albertokadiskos

Egitaraua

• Urtarrilak 31

• Otsailak 1