Ziburuko herriko plaza euskarazko musikaz eta literaturaz beteko da ekainaren 3an, bertako Disko eta Liburu Azokaren IV. edizioak egun osorako hitzordua baitakar. Bidasoaren alde bietako antolatzaileak daude atzean –Baltsan Elkartea eta ARGIA komunikabidea–, eta bi aldeetako euskaltzale eta kulturgileak batzea dute helburu.
Aurten, zehazki, 90 sormen lan berri egongo dira eskuragarri, eta 30 bat egile bertaratuko dira euren lanak bertatik bertara aurkeztera, saltzera, sinatzera.
Erakusmahaietako eskaintzaz aparte, ekainaren 3ko egitarauak hainbat hitzaldi, ikusgarri eta mahai-inguru dakartza 10:00etan hasi eta iluntzeko 20:00ak bitarte. Musikari dagokionez, honako zuzeneko kontzertuekin gozatzeko aukera izango da:
14:00. Peio Erramuzpe (Usopop).
15:00. Adrian Perez (Balio Dute).
16:30. Patxuko Nice.
18:30. Ixabe (Maitakultura).
Saio nagusia, ordea, 20:00etan izango da, Adar taldearen eskutik. Arnaud Bibonne gaskoiak eta Maider Martineau Zubieta euskaldunak osatzen duten folk taldeak boha, podoritmia, alboka, trikitia, panderoa eta kantua elkartuz bizitasun eta energiaz beteko dute plaza.