Liher taldeko abeslari eta gitarra-jolea da Lide Hernando. Baina bere hastapenak ez zituen rockaren bidetik egin, eta jatorri haietara itzuli nahian abiatu du orain Bele bakarkako musika proiektua.
Musika beltza, r&b-a eta pop elektronikoa nahastuz, proposamen berri honen aurkezpen txartela zabaldu berri du, lehendabiziko singlea eta dagokion bideoklipa: Zerua Irabazi.
Muaiskariak berak argitu duenez, Black Mirror telesaila izan du pieza honetarako inspirazio-iturri, zehazki Nosedive atala. Hala, hitzetan “zintzotasunaren diktadura” hartu du ardatz.
Kanta plataforma digital nagusietan entzun daiteke, eta ikus-entzunezkoa YouTube kanalean dago. Nitya Lopez bizkaitarra aritu da zuzendari, eta ekoizpenaz La Córnea Digital eta Epic Films arduratu dira.