Txuma Murugarrenek zortzigarren diskoa kaleratu du, Gautegia, “tonu irmoa eta kutsu zinematografikoa” duen lana. Aurrekon guztiekin alderatuta “berezia” izan dela ere aitortu du Murugarrenek, izan ere, Nick Caven Nocturama (2003) diskoa hartu du oinarri, euskarara ekartzeko. Jatorrizko diskoaren lirikotasuna eta errimak gorde ditu, baina zeharo berridatzi ditu nola letra hala musika.
Bertsioen diskorik ez du osatu lehenago, nahiz eta 2014ko Izan & Star zikloarekin hurbilpen bat egin zuen. Orduko hartan, atzerriko musikarien piezak euskal kantutegira ekartzeko proposamena luzatu zieten hainbat euskal artistari eta Murugarrenek, hain justu, Nick Caven Nocturama diskoko abestiak hartu eta hainbat kontzertu eman zituen.
Rafa Aceves (pianoa), Miguel Ramirez (gitarra eta baxua), Oriol Flores (bateria), Angel Unzu (gitarra) eta Gaizka Insunza (koruak) izan ditu alboan, egun bakarrean grabatu zuten eta, Gautegia izenburupean, diskoa erosgai da jada, Gaztelupeko Hotsak zigiluaren eskutik.
Datorren udazkenean, disko hori oinarri hartuta, hainbat kontzertu emateko asmoa duela adierazi du Murugarrenek. Eta, bestalde, iragarri du datorren urtean bere kantuekin beste disko bat osatuko duela.