Shana Waterstown

Klikatu argazkien gainean handiago ikusteko

Ostegunean (ekainak 29) hasi eta igandera bitarte (uztailak 2), IXX. Tolosandblues jaialdia egingo dute Tolosan. Shana Waterstown Floridako abeslaria eta San Franciscoco Tommy Castro gitarra-jotzailea dira aurtengo kartelak dakartzan izen erakargarrienak.

Waterstown uztailaren 1ean ariko da 23:00etatik aurrera Plaza Berrian. Castro & Painkillers-en txanda igandean izango da, 20:00etatik aurrera Euskal Herria plazan. Tommy Castrok berak, gainera, masterclassa gidatuko du uztailaren 3an –astelehena– 19:00tan Kultur Etxean.

Dena dela, beste sei kontzertu ere izango dira aukeran, blues musikaren estilo-abaniko zabalaren erakusgarri: blues klasikoa, jazz-bluesa, swing-bluesa, funky-bluesa, rock-bluesa…

Hala, zuzenean ariko dira Blues Morning Singers, Micky and The Buzz, Mingo Balaguer & Pablo Sanpa Blues Band, Fake Cousins, Cecilya Mestres & The Candy Kings, Balta Bordoy & The Bad Boys. Ekitaldiek Tolosako hainbat gune beteko dituzte, Trianguloan, Gipuzkoa Plazan, Txurrerian, Lopez Mendizabalen, Plaza Berrian eta Zerkausian ariko baitira artistak. Zuzeneko guztiak doakoak izango dira.

Honezkero blueszaleen erreferentziazko hitzordu bilakatu da Tolosandblues, eta aurtengo kartelarekin ere musikazaleen egarria asetzea espero dute antolatzaileek.