BBK Bilbao Music Legends Festival jaialdiaren seigarren edizioak baditu izen-abizenak, eta baita data ere: datorren ekainaren 23 eta 24an izango da, Bilbao Arenan.
Urte hasieran, antolatzaileek The Cult iragarri zuten kartelburu, eta gerora ere beste hainbat talde eta artistaren presentzia baieztatu dute: The Waterboys, Nikki Hill country-rock abeslari estatubatuarra, Canned Heat, Luke Winslow… eta, berriki, Chris Isaak eta Uli Jon Roth gitarra-jotzaile alemaniarra, Scorpions taldeko partaide ohia.
Madrildik Javier Vargasen blues-rocka helduko da, Vargas Blues Band-ek lagunduta. Eta euskal ordezkaritzari dagokionez, Willis Drummond banda lapurtarra, Lorelei Green, SUA eta The Daltonics igoko dira oholtza gainera, besteren artean.
Egun bakarrerako sarrerak nahiz bi eguneko bonuak eskuragarri daude jada.