Hiru hamarkada beteko dira Sorotan Bele sortu zenetik, eta halako data borobila ospatzeko Sorotan Bele Gogoan musika ikuskizuna prestatu dute Gorka Sarriegi eta Urbil Artola taldekide ohiek Baga-Biga Musika Ideiak-ekin batera.
Egitasmoaren funtsa zera da: Euskal Herriko Musika Bandek taldearen abestirik berezienak berreskuratu eta jotzea Sarriegi nahiz Artolarekin batera. Lanak errazteko, Xabier Zabala zuzendariak idatzi ditu bandentzako egokitutako partiturak.
Ekimenaren helburua Sorotan Bele-k euskal musikagintzari utzitako ondarea transmititzea da, eta horretan Euskal Herriko musika bandak nahastea, euren herrietan jotzeko, 90eko hamarkadako taldearen abesti mitikoez berriro gozatzeko.