SAREAko kide diren programatzaileen eta musikaren sektoreko profesionalen arteko topaketa antolatuko du beste urte batez Euskal Herriko Musika Bulegoak. 

Aurtengoa seigarren edizioa izango da, eta apirilaren 27an egingo dute Elorrioko Arriola Antzokian. Topaketa profesional hauen helburu nagusia programatzaileak eta artisten arteko zubi-lana egitea da. Horretarako, musika proposamenak aurkeztu ahal izateko, deialdi berezia zabaldu du EHMB-k eta martxoaren 1eko 14:00ak arte mantenduko dute martxan. 

Martxoa erdialdera jakinaraziko dute zein diren hautatutako proiektuak, eta 120 euroko diru-laguntza bana jasoko dute.

Bestalde, berrikuntza modura, aurten lehenengo aldiz, ordu eta erdiko networking saio bat egongo da. Taldeek eta artistek bost minutuko bilera azkarrak egiteko aukera izango dute programatzaile guztiekin.