Klikatu argazkien gainean handiago ikusteko

1991 urtean argitaratu zuen Piztiak taldeak bere lehen EPa: Huts nazazu. Juan Carlos Perezek ekoiztutako disko hartan Jimmy Arrabit (Itoiz) eta J.J. Yurrita (Delirium Tremes) ere aritu ziren laguntzaile baterian; Eduardi Yurrita piano akustikoan eta Itzar Alberdi ahotsean Hire abestian. Elkar argitaletxearen bitartez merkaturatu zuten, binilo nahiz kasete formatuan.

Lehen singlea Nazkante! izan zen, bigarrena Itzulia. Beltza garaiko pop ilunaren lekuko da eta Hire abestian pianoan egindako lan ederra antzeman daiteke. Aurkezpen kontzertua Euskadi Gazteak antolatu zuen Donostiako autodromoan Hertzainak eta Tahures Zurdos-ekin batera.

Orain, 29 urte geroago, Piztiak taldeko kideek lan hura plataforma digitaletan argitaratzea lortu dute, eta pozik daude oso: “Guretzat oso garrantzitsua da oraingo eta hurrengo belaunaldiek gure musikaz gozatu ahal izatea”.