Pirineos Sur Kulturen Nazioarteko Jaialdia bueltan da. Aragoiko Auñamendien bihotzean, Tena bailaran antolatzen duten festibalak 2023ko egitaraua zabaldu du eta sarrerak ere salgai jarri dituzte webgunean; kontzertu solteak ikusteko nahiz asteburu baterako baino gehiagorako txartelak ere.
Izan ere, uztaileko azken lau asteburuetan, 11 gau guztira, musikaz beteko dira Sallent de Gállego herriko Lanuza urtegiko eszenatoki flotantea eta auditorioa, 5.500 lagun hartzeko prestatua.
Jaialdia indartsu hasiko da, uztailaren 7an, ostiralez, Bomba Estéreo, Muerdo eta Dj Lord Sassafrasen eskutik. Larunbatean Rubén Bladesek eta La Santa Ceciliak hartuko dute lekukoa, eta igandean La Pegatinak eta Chef’ Special-ek borobilduko dute lehenengo asteburua.
Bigarren asteburuko izen nagusiak Los Chikos del Maiz eta Love of Lesbian, Xavier Rudd eta Ludovico Einaudi izango dira. Hirugarren astebururako, besteak beste, Dubioza Kolektiv, Luz Casal eta Valeria Castro iragarri dituzte; eta laugarren eta azken astebururako proposamenak Rozalén, Silvana Estrada eta ZAZ dira, beste batzuen artean.
Detaile guztiak eta alojamenduaren nahiz garraioaren gaineko info praktikoa pirineos-sur.es webgunean kontsulta daiteke.