Kraftwerk, Jan Hammer, Vangelis edota Jean Michel Jarre bezalakoen elektronika primigeniotik edaten du Zabalak. Bilboko musikari eta ekoizleak Black Crystals proiektuan murgilduta dabil burubelarri eta, jada iaz, elektro-ambient zinematografikoa jasotzen zuen Vik izeneko EPa kaleratu zuen.
2020ko martxorako uzta berria iragarri du eta, aurrekari gisa, Opening singlea zabaldu du. “Izarretara, iraganera nahiz etorkizunera bidaiatzeko txartela” omen dakar proposamen honek.
Soinuaren inguruan berezko unibertsoa eraikitzen dabil Zabala. Espazioa zentzu betean jorratzen du, baita intimotasuna ere. Errepikapenetara maiz jotzen du, trantze sentsazioa sorrarazteko ahaleginean. Etiketak, garaiak eta estilo itxiak arbuiatuz, cool elektronika klasikoa gaur egungo soinu banda bilakatu nahi du.