Muda du izena Thierry Biscary artistaren bigarren diskoak. Azalberritzea, ileberritzea, bozaberritzea. Behe Nafarroako abeslariaren arabera, lan berri honek bere fase berri bat gorpuzten du, bere garapen pertsonalaren eta nortasun-eraikitzearen emaitza baita.
Abestien hitzen idazketan, Thierryk berak ez ezik, Uxue Alberdi, Jon Benito, Leire Bilbao, Itxaro Borda, Xabier Euzkitze eta Jon Maia olerkari eta bertsolariek hartu dute parte.
Musikari dagokionez, Jeremie Garat ekoizle xiberotarrak egin ditu moldaketak Biscaryren konposaketen gainean. Musika goxoa da, lasaia, malenkoniatsua. Jeremie Garat (ahotsa, gitarrak, mandolina, txeloa) ez ezik, Thierry Biscaryk beste bi musikari ere izango ditu lagun eszenatoki gainean: Joel Merah (ahotsa, mandolina, bandurria, gitarrak) eta Amaiur Cajaraville (ahotsa eta kontrabaxua).
Martxoa amaiera eta maiatza erdialdea bitarte, Thierry Biscaryk lau kontzertu emango ditu Muda disko berria aurkezteko:
Martxoak 20. 20:30. Azkuna zentroa. Bilbo.
Apirilak 3. 20:00. Lugaritz kultur etxea. Donostia.
Apirilak 5. 17:00. Harriet Baita. Donibane Lohitzune.
Maiatzak 14. 20:30. Erraldoien txokoa. Iruña.