Korrontzi musika taldeak Korrontzi Benefic saioa egingo du hirugarren aldiz. Oraingo honetan, Euskal Herri osoko hainbat dantza talderekin batera eszenaratuko dira euskal musika tradizional-garaikidea dantza ikuskizun aberats batekin uztartzeko. Zuzeneko handi eta jendetsua izango da, 200 lagun baino gehiago igoko baitira oholtza gainera.
Izen handiko koreografoek sortutako piezak dantzatuko dituzte; Jon Maya, Edu Muruamendiaraz, Igor Yebra, Izaskun Iturri, Eneko Gil eta Oinkari bezalakoak ere batu baitira elkartasun ekimen honetara.
Saldutako sarrerekin bildutako dirua merosina defizita pairatzen duten umeen alde diharduen ImpulsaT GKEra bideratuko dute. Saioa abenduaren 23an izango da, 20:00etan, Bilboko Campos Antzokian.