Kea duela bi urte sortu zuten Beasainen. Hiru kidez osatua dago eta aurretik, stoner-a, nu metala edota grungea egiten zuten talde batzutan aritutakoak dira. Taldearen izena trokelatua dakarren diskoa argitaratu berri dute, sei abestiz osatua. Giro eta intentsitate ezberdinen peskizan, baretasunarekin egin dute topo. Esaterako, Ametsetaz abestiak Zein? taldearen lehen diskoaren giro ketsuak dakarkigu gogora.

Vostok taldea Zarautzen lekutua dago. Sei pertsonek osatzen dute, lau zarauztarrek eta bi azkoitiarrek. Urrestillako entsegu lokaletan grabatu dituzte maketa honetara bildu dituzten zazpi abestiak. Rock, power pop eta grungearen ukituak dituzte, eta ezinbestean, Pearl Jam-en gisako taldeak etorriko zaizkio burura entzuleari. Diotenez, beren soinu propioa bilatu nahian dabiltza. Argi dago halere, energia eta indarra ez zaiela falta.