Klikatu argazkien gainean handiago ikusteko

Kolpe

Euskal kulturaren periferiatik konplexu gabe kantatzera dator Kai Nakai. Euskal musikari aire berri bat eman nahi dio, euskaraz ere perreatu daitekeela frogatuz. Erritmo dantzagarriak abesten ditu Iratxe Aguilera gasteiztarrak, Chickjuarez musikari eta ekoizlearen konposizioetan oinarrituta.

Bere aurreneko diskoa izango dena DeepSodaren bitartez kaleratuko du. Baina, momentuz, Kolpe lehen singlea aurkeztu du. Aguilerak perreoa, dantzarako erritmoak, sentsualitatea eta emakumezkoen boterea adierazten ditu betidanik gizonezkoak nagusi izan diren musika estilo honen esparruan.

Bideoklipa ere ikusgai dago Sarean. Julen de La Serna gasteiztarrak zuzendu du, eta alderdi artistikoa Tamara Araveciaren ardura izan da.

Iratxe Aguilerak 2019ko Durangoko Azokako deituriko II. Sormen Beka irabazi zuen, eta Kolpe pieza da Gerediaga Elkartearen babesa jaso duen proiektu honen lehen emaitza.