Atzera kontaketa hasi da 40. Herri Urratserako. Ipar Euskal Herriko ikastolen aldeko festa handia Senpereko lakuan antolatuko dute aurten ere, eta pixkanaka-pixkanaka ari dira iragartzen zein taldek emango duten kontzertua.
Haize Arrosa bandaren parte hartzea konfirmatu dute. Berrizko taldeak doinu dantzagarriak eramango ditu Herri Urratseko oholtzara: folk-rock, Irish-folk-rock, pop-rock, country-rock, elektro-pop-triki, world-fusion, balada, flamenkoa, mex, fandangoa, a capella edota ambient... Joko dute, ziur, aurkezpen-single modura plazaratu zuten eta Onintza Enbeitak idatzi zuen Tortolaraino kanta. Bestetik, Gozategi taldeak ere egingo du ekarpena.
Maiatzaren 14an izango da festa handia, eta programazio osoa apirilaren 18an zabalduko dutela argitu dute. Dagoeneko ikusgai eta entzungai dago, ordea, 40. Herri Urratsi doinua eta hitzak jarriko dizkion Urratsak Zubia bestia. Su ta Gar talde eibartarrak konposatu dute, Donostiako Elkar estudioetan grabatu dute, eta Inge Arin artistak egindako bideokliparekin batera sareratu dute.