Reggae unibertso zabala esploratzen duten bi kantaz osaturiko singlea da Gorka Suaia & Ama Rebel binomioak eman duen berriena.

Gorka Suaik rapean eman zituen bere lehenengo pausoak, gero raggamuffina jorratzera pasatzeko. Zentzu horretan, Ama Rebel bere backing band gisa uler daiteke, bere konposizio eta doinuak zuzenean aurkezteko beta eskaintzen dion musikaria. Ekoizpenaz, ordea, Pantx arduratu da.

Bi kantu, beraz, single honetan entzungai. Alde batean, Selfie ala hil. Selfieak ateratzeko modatik abiatuz, abestiak egungo gizarteak daraman bizimodu ero eta azkarra du ardatz, itxurakeria zorrotz kritikatuz.

Beste aldean, Subgrabe artean. Beren estiloaren lagin fidelagoa, akaso, raggaean zentratua, nostalgia bidelagun izanda, etorkizuna eraikitzen jarraitzeko prest agertzen dira.