Zuzeneko disko bat izango da Gariren hurrengo uzta. Azaldu duenez, estudioko diskoek ez dute islatzen egiten duena, eta horregatik jaso nahi du zuzenekoen mami osoa. Ekainean bira bat egingo du horretarako.
Diskoa “ibilbide zabal baten erretratua” izango dela aurreratu du. Izan ere, musikari gisa hasi zeneko maketak berreskuratu eta garai hartako 26 kanta aukeratu ditu ekaineko emanaldietarako.
Maldanbera taldearekin batera igoko da oholtzara. Alex Alonso bateria-jotzaileak, Oier Aldekoa baxu-jotzaile, teklista eta abeslariak, eta Miguel Moyano abeslari programatzaile, teklista eta gitarra-jotzaileak osatzen dute taldea, Unai Mimentza soinu teknikaria eta John Luhman argi teknikariarekin batera.
Bidelagunek, orotara, lau geldialdi egingo dituzte Euskal Herrian: Ekainaren 3an Lazkaoko Areria antzokian izango dira. Ekainaren 7an, Bilboko Arriaga Antzokian. Hilaren 10ean Muxikeberri Antzokian egingo dute emanaldia, Algortan. Eta, bukatzeko, ekainaren 17an, Bergarako Seminarixuek hartuko du kontzertua.