Aurtengo Dardara Fest jaialdia bi saiotan banatu dute antolatzaileek. Abuztuaren 20an, ostiralez izango da lehena. Cobra laukoteak ‘Fyre’ diskoa aurkeztuko du, bandaren iraupen luzeko laugarren lana. Bamms hernaniarrak izango dira eguneko bigarrenak. Last Chance disko argitaratu berria aurkeztuko dute Zumaiako publikoaren aurrean.

Larunbateko kartelburua Grises izango da. Zestoakoek sei lan luzeko diskografia osatu dute jada, berriena, Talisman, 2020an kaleratu zuten. Amaitzeko, Aretxabaletko Wood Strings igoko dira agertokira. Emanaldi honetan laster argitaratuko duten 'Isladak' diskoa aurkeztuko dute zuzenean. 

Kontzertu guztiak 19:00tan hasiko dira, eta sarrerak 6 euroren truke eskura daitezke. Bi eguneko bonoak ere badaude aukeran.