Zugzwang estudioko seigarren lana Euskal Herrian (Bilbon eta Miarritzen) aurkeztu ostean, Japonian, Australian, Tahitin eta Europan emango dituzten kontzertuak prestatzen ari da Willis Drummond taldea. 16 zuzeneko otsailaren 14tik martxoaren 28ra bitarte!
Bien bitartean, Bigarren Aukera klipa Sareratu berri dute. Bira Produkzioak-ekin elkarlanean, “Bigarren Aukera kantak merezi dituen irudi ederrak” baliatu dituzte abestia are gehiago janzteko.
Bideoak bi berezitasun ditu. Batetik, 6 minutuko plano bakar batek osatzen duela, Beñat Iturriozen zuzendaritzapean grabatua. Eta, bestetik, kantaren grabaketan parte hartu zuten hainbat lagun elkartzea lortu dutela: Anari, Joseba Irazoki, Johannes Buff; baita urtetan zehar Willis Drummond abenturaren parte izan diren beste hainbat adiskide ere, edota sare sozialen bitartez kontaktatutako zale berriak ere! “Familia kontu baten harira idatzi zuen kanta hau Felixek, eta familian eman diogu forma”, argitu dute.
Willis Drummond taldeak momentuz ez du beste kontzerturik iragarri Euskal Herrian.