Iaz lehenengo aldiz, Andoaingo Udalak Bloody Mary denda eta sustatzaile ezagunarekin batera antolatu zituen Basterock Gauak. Munduko txoko desberdinetatik heldutako rock&rolla entzuteko parada izan zen eta esperientzia ongi irten zenez, aurten Basterock Gauak ekimenaren bigarren edizioa burutuko da. Los Coronas espainiarrek irekiko dute denboraldi berria, eta ondotik Graham Day & The Gaolers britainiarrak ariko dira, Ohion jaiotako Crazy Joe, Los Angeleseko Pat Todd & The Rankoutsiders eta bukatzeko El Vez mexikarra.