Steven Tyler buru duen Aerosmith banda mitikoak behin betiko utziko ditu eszenatokiak. Hala iragarri dute ikus-entzunezko dibertigarri baten bitartez. Mende erdi baino gehiago oholtza gainean aritu ostean, Peace Out izeneko birarekin agurtuko dituzte zaleak.
Momentuz, 40 bat hitzordu baieztatu dituzte 2023 eta 2024 bitarte Ipar Amerikan. Irailaren 2an abiatuko dute Filadelfian, eta urtarrilaren 26an bukatuko dute Montrealen. Ikusteke dago, ordea, Europan barrena jarraipena emango ote dioten.
Tyler (ahotsa), Brad Whitford (gitarra), Tom Hamilton (baxua) eta Joe Perry (gitarra nagusia) ariko dira kontzertu-sorta honetan; ez, ordea, Joey Kramer (bateria eta taldearen sortzaileetako bat).