Fugazi taldeko bateria-jole Brendan Cantyk ekoiztutako DVD sortaren bigarren lana dugu honakoa. Aurrekoak Washington D.C. inguruko zenbait talderen kantu bana jasotzen bazituen, bigarren ekoizpen honek Chicagon hartu du egoitza. Hirugarrena Portlanden grabatuko dutela iragarrita dago jada. Burn to Shine DVD sorta hauen ideia zera da: bota behar duten etxe zahar batean (ahots batek ingelesez etxearen historia kontatzen digu) hainbat talde biltzen dira zenbait kanta zuzenean jotzeko (ondoren eraikina nola suntsitzen duten erakusten zaigu). Chicagon bederatzik parte hartzen dute, eta musika kalitatea gorabeheratsua da: batzuk izugarri onak (Tortoise, Freakwater, Shellac eta, batez ere Wilco); beste talde batzuen maila kaskarragoa da, Washingtongo aurreko DVDan gertatzen zen moduan (Bob Mould akustikoan jotzen ikustea plazer hutsa zen, baina beste batzuk...). Aipagarria da Christoph Greenek zuzenduriko DVDaren irudi eta soinu (Bob Weston ekoizlea arduratu da) kalitatea, biak oso onak.