Buitraker berritua (indarberritua) aurkitu dugu diskoa biraka hasi bezain pronto. Buitraker aldatuta datozkigu, baina Buitraker izateari utzi gabe. Hasteko, jada ez zaizkigu horren oldarkorrak iruditu, baina ez diote gitarren indarrari muzin egin, distortsio metalzaleari. Aitor, gitarraz libratuta, erosoago sumatu dugu, hobe, eta taldearen oinarri erritmikoa indartsu heldu zaigu belarri zuloetara. Buitraker show kantuak irekitzen du lana: intentzio deklarazioa, bizi-bizi daudela ziurtatzeko. Pasarte geldoagoetan bikain aritzen dira (Errekan) eta ez dira ez, estilo nahasketan itotzen (Urrezko kabiak). Kantuak oro har luzeak dira eta ekoizpena ona da. Rock, metal, elektronika eta poparen arteko nahasketa dakar disko honek, orain arte Buitrakerrek egin duen onena.