Blues, pop eta jazz doinuak jorratu ohi dituen abeslariak lan mugituago batekin datorkigu. Bere aurreko lanetan batik bat akustikotasunaren barnerakoitasuna jorratu izan badu ere, Thunderbird-en perkusioek eta loop programazioek garrantzi handiagoa hartu dute, T-Bone Burnett (Elvis Costello, Wallflowers, Gillian Welch) produktorearen eraginpean. Diskoak kolaboratzaile aski arituak biltzen ditu: Marc Ribot gitarran, Mike Elizondo programazioetan eta Bill Piersante baterian, esate baterako. Emaitza disko guztiz gozagarria da, batik bat Wilsonek inoiz ez bezala abesten duelako maiz trip-hop kutsua duten kanta erakargarri hauetan. Jazzaren eta bluesaren iragana eta etorkizuna Thunderbird-en maisuki lotzen dira.