Glasgow aldekoa dugu Francis Macdonald, kasu honetan Nice Man ezizenaren atzean bigarren diskoarekin datorkiguna. Eta kasu honetan diogu besteak beste Teenage Fanclub taldean ere aurkitu dezakegulako bateria-jole lanetan. Horretaz gain, Eskozia aldeko Shoeshine eta Spit & Polish diskoetxeen arduraduna ere bada, lehena popari eta bigarrena countryari zuzenduta daudelarik. 2002an lehen diskoa kaleratu ostean, bigarren honetan aurretik irakurri duzun guztiaren eragina nabari daiteke, hau da: pop, rock eta countrya nahasten dira lan honetan aurkitzen ditugun hamabost kantuetan. Glasgow aldean ekin zion kantuok sortzeari eta Valencia aldean amaitu eta grabatu zituen, argi izpi bat nabari daitekeelarik lan osoaren atzean. Forever is a long time with you, Sayo edo Tamborine bezalako kantuek lan osoa gidatzen badute ere, Mine Mine Mine bezalako kantuetan rock ilunarekin ere aurkitu zaitezke. Betiko popa gustuko baduzu ongi, horrela ez bada ordea, aspertuko zara.