Aurretik Cool Panic edo Fly Shit bezalako taldeetan aurkitzen genituen Mahaster River taldeko musikariak. Formatu berezian datoz, izan ere ez dute bateriarik erabiltzen; baxuak hartzen du erritmoa markatzeko lana. Honela, bi gitarra, baxua eta ahotsak dira hauen musika gauzatzen dutenak. Tabernarako formatua. Hemen, Euskal Herrian, faltan botatzen dugu formazio hori, bere garaian Las Brujas bezalako proposamenek eskaini zigutena. Momentu alai (Ezagutzen gaittuk) zein intimistak (Akorde intimuak) aurki ditzakegu diskoan. Gero Ennio Morricone, Bo Didley edo T-Bone bezalakoen bertsioak datoz. Zaila egingo zaizu hasieran, arraroa agian, baina entzunaldiak aurrera doazen heinean gozatzen da disko hau. Eta esan dudan moduan, batez ere taberna zuloetako ke eta alkohol arteko gau basatietan gozatzeko musika egiten dute.