90. hamarkada erdi amaieran, modan jarri zen mestizaia musikala. Hamar urte lehenago Mano Negra bezalako taldeek hasitako bideak arrakasta komertziala lortu zuen orduan. Erritmo beroen garaia zen eta estilo desberdinen mugak apurtzeko joera zegoen, haize freskoa eta aberastasuna ekarriaz musika munduari. Amparanoia, Color Humano, Sargento Garcia, Dusminguet, Macaco, etab. Asko izan ziren sortutako taldeak eta horietako gutxi batzuk, bidean jarraitzen dute oraindik ere. Bartzelona hiria, baratza aproposa izan zen antzeko taldeen sorreran. Kultura desberdinen bidegurutzea da eta modu naturalean (gehienak) sortu ziren taldeak Rabal bezalako auzoetan. Zulu 9.30 taldea ere bertan sortutako taldea da. Aurrez aipatutako taldeen bideari jarraituz, Afro latin reggae deitzen dutena egiten dute; hau da, erritmo afrikarrak, latinoak eta jamaikarren arteko porrusalda (salsa, son, reggae, rap, rock, rumba, etab). Erritmo goxoak, beroak eta dantzagarriak, mezu baikor eta aldarrikapenekin lagunduta. 2005. urtean lehen diskoa kaleratu zuten (
Conecta o Revienta) eta oraingoan
Huellas izeneko honekin datoz.