Gaztelupeko Hotsak-ek bere Errabal azpizigiluaren bidez Euskal Herrian jazza egiten duten musikari apurren grabaketak ekoizten jarraitzen du. Berriki kaleratu duen diskoa Jon Urrutia piano-jole bilbotar gaztearen hauxe dugu. Home Made lana, estreinako diskoetan gertatzen ohi denez, jazz eklektikoaren bidetik doa, eragin desberdineko estiloak tartekatuz. Baina, egia da, CDak baduela jazz latinoaren ildoan kokatu daitekeen soinu orokorra, perkusioaren erabilera erritmikoak erakusten duenez, esaterako, diskoaren hasierako Rhythm Medley edo aurreragoko Entre tangos y cha-cha-cha kantetako kubatar erako kongetan edo, bossa nova kutsuko Sous sleur d/epine abestian. Oro har, Urrutiak instrumentu guztien soinua indartzen du, bere piano soloak tartekatuz, baina gehiegizko presentzia nabaririk gabe.