Estreinako lanaren ildo berean eta distortsioetatik urruti, gorroto zein amodioz idatzitako zapore garratzeko 10 kanta eder jaso ditu Fiachrasek bere bigarren lanean. Fiachras ezagutzen ez duten haientzat, jakin, Bizardunak nafarren anaia zaharrak direla. Anaiak diogu bi taldeen artean partaideak konpartitzen dituztelako eta lantzen duten musikak jatorri bera duelako. Zaharrak berriz, Fiachras lehenago sortu eta lehenago kaleratu zuelako aurreneko diskoa. Alta, ulertzea kosta egiten zaidan arren, komunikabideek batzuei egin diete kasu, besteak ahanzturan galduz. Baina itzuli dira, eta odol egarriz gainera.
Karlos 'Txap'en agindutara grabatutako Hiltzera goaz diskoan, gitarra akustikoa, baxua, bateria, eskusoinua, klarinetea, hammonda, armonika, flauta eta ahots landuen babesean, euskaraz eta gaztelaniaz, maitasun zein guda kantuak entzungo ditugu. Heroi zein antiheroiei abesten diete, egun dituzten desio eta kezkak azalduz. Beharbada ez da estreinako diskoa bezain borobila, baina zinez da disko eder eta gomendagarria.