Pasa den udazkenean Miren Aranburuk plazaratutako diskoa (bigarrena Errabal zigiluarentzat) aurreko Gorri Isila-ren nolabaiteko jarraipentzat har liteke. Diskoa ixten duen kantak (Iluna eta gero) elektronika berritzailearen kutsua badu ere, orokorrean baladen eta jazz-funkaren artean mugitzen da lan hau. Nabariena, noski, Miren Aranbururen ahotsa da, mid-tempo sentsualitate eta free-aren artean mugitzen dena. Musika, oraingoan ere, Jean Louis Hargous-ek konposatua da (diskoa Frantzian grabatu dute bertako musikariekin), eta bere tronpetak gidatzen du taldearen soinua, Lorategi hibridoa diskoa jazz atsegina bihurtuz.