Zer sentitu zenuen lehen aldiz didgeridoo-a entzun zenuenean?

Musika tresna honen behe-soinuak, soinu sakonak eta soinu elektrikoak erakarri ninduten. Musika tresnaren formak ere erakarri ninduen. Kontzertu batean entzun eta ikusi nuen lehenengoz.

Horregatik joan al zinen Londresera?

Ez. Esperientzia berri bat izatera, independentzia apur bat lortzera eta ingelesa ikastera joan nintzen hara. Didgeridoo-arekin kasualitatez egin nuen topo. 20 urte bete nituenean oparitu zidaten nire lehen didgeridoo-a eta jotzen hasi nintzen.

Autodidakta moduan hasi zinen. Lehenengo saioetan lortzen al zenuen didgeridoo-a jotzea?

Lehen egunean ozta-ozta lortu nuen soinuren bat eta arnasketa egokia nola egin jakin gabe urtebete eman nuen. Hala ere, asko ikasi nuen nire kasa. Baina arnasa nola hartu erakutsi zidatenean, aurrerapausoak nabarmenak izan ziren.

Ikasle izatetik irakasle izatera pasatu zara?

Bai. Hainbat irakaslerekin ikasi nuen Madrilen, Amsterdamen, Italian, Belgikan, Frantzian eta baita Australian ere maisu aborigenekin. Euskal Herrian klaseak eta ikastaro trinkoak eskaintzen ditut. Donostian lokal bat dut eta mota guztietako jendea joaten da bertara ikastera.

Garma jaialdiaren modukoa antolatu al liteke Euskal Herrian?

Bai, noski, egin daiteke didgeridoo-arekin lotutako jaialdia. Nik hemengo maisu eta taldeekin egingo nuke. Garma oso polita izan zen, aborigenek beraien kultura, dantza, pintura, ohiturak eta yidakia (didgeridoo) erakutsi ziguten modu sinple eta naturalean.

Nolakoa da Iban Nikolairen zuzenekoa?

Didgeridoo eta perkusio soinuen bidez dantza egiteko eta gorputza mugitzeko kantuak eskaintzen ditut. Naturaren doinu oinarrizkoetara eta zaharretara hurbilpena.

Zenbat didgeridoo dituzu?

Hamahiru. Gehienak egiazko didgeridoo-ak dira, hots, Australian termitek hustutako eukaliptozkoak. Hainbeste ditut bakoitzak tonu bat duelako. PVC, banbu, teka eta beste hainbat materialez eginiko didgeridoo-ak ere baditut. Normalean eukaliptozkoen soinua hobea da eta horregatik dira garestiagoak. Benetako didgeridoo-en gauzarik politena denek soinu ezberdina dutela da, bakoitzak bere berezko soinua du.

Zer moduzko harrera izan du zure diskoak?

Euskal Herrian ohikoa ez den musika entzutea erakargarria da jendearentzat eta harrera ona izaten ari da. Disko bitxia da. Bertan Vietnamgo aho-harpak, gitarra flamenkoak eta beste hainbat tresna entzun ditzakegu, Maria Simonson kantariaren ahots bikainarekin batera.

2004-05, ABENDUA - URTARRILA