“Hamasei abesti eta omenaldi on bat”, horixe da Bizitzarekin Dantzan diskoa Urtz taldeko kideen esanetan. Sentimenduetatik hardrocka eta rocka egin zuten 27 urtez, eta ibilbide oparo horren lagin arrakastatsuena bildu dute orain; Ai Amatxo! bere lehen arrakastatik hasi eta Eguzkitan Bero bere azken abestira arte, kutsu gazteko Ez Gaitu Inork Geldituko sonatutik pasatuz. Guzti-guztiak publiko mota anitzarengana heldu diren kantak dira.
Bost euskal diskoetxeren (Gor, Elkar, Baga Biga, EDG Music eta taldea bera) eskutik kaleratu izan dituzten hamasei rock abestiak Gor argitaletxeak kaleratu ditu orain, eta salgai dago jada.