2020ko BBK Music Legends Festival-eko kartela mamitzen ari da. Ekainaren 5-6 egunetan, Sondikako Ola BBK Aretoan antolatuko duten jaialdia tantaka-tantaka ari da izen berriak ezagutarazten. Aurtengo kartelburu Supertramp’s Roger Hodgson izango da, eta Joanna Connor ere baieztatuta zegoen jada.
Orain, izen berri bat gehitu dute zerrendara: The Jayhawks. Estatu Batuetako musika herrikoia egiten duen banda onena da askoren iritziz. Munduko talde ezezagun onena dela esaten dute askok.
Gene Clark, Neil Young edota Gram Parsons-en ubera jarraituz, sentsibilitate handiko melodia eta hitzak konposatzen dituzte, eta armonia bokalak dituzte bereizgarri. Ahotsa, gitarra elektrikoa, baxua, bateria eta teklatua ez ezik, biolina eta mandolina ere integratzen dute euren musikan.
BBK Music Lengends Festivalek, aurreneko 400 sarrerak agortuta, ‘Sarrera + Legend’s Pack’ promozioa jarri du martxan, 85 euroren truke, urtarrilaren 6ra arte.