Itxialdi egunotan hain erabilia den bideo-grabaketa moduko formatua erabilita, Skakeitan taldekoek Ezpainetan Odola kantaren bertsio berezia Sareratu dute hainbat lagun musikarirekin batera. Bideoan Pello Reparaz, Izaro Andres, Eider Saenz eta Markel Idigoras (Nogen), Aiora Renteria, Ane Barrenetxea (Sua), Sara Zozaya, Xabi Bandini, Gary Uriarte (Dupla), Juanjo Berasain (Ezpalak) eta Gartxot Unsain (Madeleine, Grises) eta ageri dira.
Orain, Skakeitanekoek formula bera erabili nahi dute euren jarraitzaileekin batera antzeko bideo bat osatzeko. Proposatu duten kanta berbera da: Ezpainetan Odola. Eta baldintzak: tenpoa (128 bpm) nahiz tonua errespetatzea. Kaskoetan kanta originala entzun eta gainetik abestea eskatzen diete parte-hartzaileei. Bertikalean grabatzea komeni da eta ahotsa bakarrik entzun behar da bideoan.
Parte hartu nahi dutenek ezpainetanodola@gmail.com helbidera bidali behar dute euren grabaketa. Skakeitan taldeak aukeraketa bat egingo du, eta aukeratutako horiek Pello Reparazekin batera kantatzen agertuko dira bertsio berezi eta berri honetan.
Halaber, parte-hartzaile guztien artean Skakeitan taldearen diskografia, kamiseta bat eta poltsa bat zozkatuko dituztela iragarri dute.