Zaldi Emozionalak

Zaldi emozionalak bideoklipa eta Helduentzako sehaska kantua I abestia aurkeztu ditu Pettik bere disko berriaren aurrerapen gisa. Estudioko lan osoak ekainaren 1ean ikusiko du argia, Manipulazio estrategiak izenburupean eta *Zart kolektiboaren eskutik.

Komunikabideek jendartea manipulatzeko erabiltzen dituzten estrategien inguruko lana da. Hain justu, Noam Chomskyk gaiaren inguruan egindako gogoetak hartu dituzte abiapuntutzat Harkaitz Cano idazleak eta Petti musikariak; lehenak hitzak idatzi ditu, eta bigarrenak musikatu.

Atala eta Bonberenea estudioetan grabatu ditu kantak Pettik, eta hainbat adiskide izan ditu bidelagun: Etxeko Uzta (Joseba Irazoki, eta Igor eta Iñigo Telletxea), Et Incarnatus hari laukotea, Juantxo Zeberio teklatu jotzailea, Gorka Benitez saxofonista, Toño Muro eta Maite Larburu koroetarako.