Deustuko Patxadaz taldea 2018an sortu zen, eta bi urte baino gehiagoren buruan kaleratu dute lehen diskoa. Taldearen izen berbera aukeratu dute aurreneko lanari titulua jartzeko. Bederatzi kanta dira, estilo nahiz gai ezberdinak jorratzen dituztenak. Musika alderdiari dagokionez, metal, funk nahiz rap erritmoak uztartu dituzte. Hitzei dagokionez, eguneroko gorabeheretan bilatu dute inspirazioa taldekideek, baina kritika sozialak eta aldarrikapenek ere badute lekua diskoan.
Bandcamp-en doan deskargatzeko aukera eskaini dute Patxadaz-ekoek. Eta bi aukera daude: diskoa borondatea emanez deskargatzea edota erabat doan deskargatzekoa. Disko fisikoa, momentuz, sare sozialen bitartez (Instagram/Facebook) eta korreoz erosteko aukera emango dute. Spotify eta Youtube plataformetan entzun daiteke jada.