Oreka TX banda osatzen dutenek azken urteotan egindako “lanaren eta musika ikerketaren emaitza” da laugarren disko hau, taldekideen beraien hitzetan. Egurra, harria eta banbua baliatuz, sustrai musika eta doinu garaikideagoen artean bilatu dute oreka.
Koklea lanak oinarri instrumentaldun 14 kanta biltzen ditu, eta horretarako Xabier Zeberio eta Karlos Subijana musikariek kolaboratu dute, besteak beste. Ahotsari dagokionez, urte hauetan guztietan Oreka TXrekin hainbatetan aritutako lagunak batu dira oraingoan ere: Thierry Biscary (Euskal Herria), Aziza Brahim (Mendebaldeko Sahara), Monica de Nut (Galiza), San Salvador (Okzitania) eta Emi Toko (Japonia).
Harkaitz Martinez de San Vicente eta Mikel Ugarte txalapartariek, eta Mixel Ducau, Iñigo Egia eta Juanjo Otxandorenak Oh Brother estudioetara jo dute diskoa grabatzera, eta Musik’art proyect estudioetan egin dituzte nahasketak eta masterizazioak. Azken emaitza Durangoko Azokan jarriko dute salgai eta, iragarri dutenez, Ahotsenea sortzaileen plazan showcase bat egingo dute abenduaren 5ean 16:20ean. Aurkezpenaren ostean, birari ekingo diote: Andoain, Altsasu, Barakaldo, Mutiloa eta Noain dituzte geltoki.