Itxialdia sormen garai oparoa izan zen Mikel Chamizo konposatzaile tolosarrarentzat. 2020ko apirileko egun haietan ernaldu eta forma eman zion Chamizok Under Lockdown soinu bandari.
Konfinamenduan zehar bizitako esperientzia eta aldarte ezberdinak pianorako 10 miniaturatan islatzea zen bere ideia: hasierako beldurra, egunen joana, errutina, itxaronaldia, dolua, ilusioa, ezjakintasuna… eta ‘normaltasun berrira’ itzulera.
Estreinaldi absolutua Musikenen egin du, eta Pierre Delignies pianistak jo du. Hori baino lehenago, baina, partitura aurkeztu dute; Julio César Pérezen marrazkiekin osatua eta Angel Erroren prologo batek lagunduta.