Maria Riverok 2017an ipini zion bere buruari erronka musikal berri bat: bakarka aritzea. Kintsukoroi proiektua aurkeztu zuen orduan, eta orain, 2020an, bakarkako lehen diskoa kaleratu du: Parentesiak.
Barrura begirako lana dela adierazi du Balmasedako abeslariak: “Parentesi artean idatzi ohi diren azalpen guztiak bezalaxe, disko hau ere ezinbestekoa da nire burua ezagutzeko”. Zazpi kanta dira guztira, eta bonus track bat.
Jagoba Ormaetxearen eskutik ekoitzi du, Bilboko Taom estudioetan grabatu du eta hainbat kolaborazio musikal ere badakartza, tartean, Migue de La Rosa musikari kubatarra, Zuriñe Hidalgo eta Iker Lauroba.
Maria Rivero abeslaria, batez ere, Siroka taldeari ahotsa jartzeagatik da ezaguna. Baina Hutsa eta Apurka bikoetan ere ibili da.