Hauts (2016) diskoarekin egin zuten debuta. Tenpluak erre (2018) bigarren estudioko lanarekin berretsi dute talentua eta indarra. eta bira luzea egin dute gainera. Orain (otsailaren 28an izango da kalean) hirugarrena dator: Hemen herensugeak daude.

Lide Hernandok (ahotsa, gitarra), Iñigo Etxarrik (gitarra, koroak), Joshka Natkek (baxua, koroak) eta Ander Berzosak (bateria) konposatzen duten musikan ohikoak diren stoner eta soul ukituek ez dute huts egingo; baina blues rockak aurrekoetan baino leku garrantzitsuagoa hartuko du, baita punkak ere, bere aurpegi ezberdinekin.

Baina Hemen herensugeak daude ez da 14 musika piezaz osatutako bilduma bat bakarrik; musika, ilustrazioa, ikus-entzunezkoa eta narrazioa batuz, istorio bat kontatzen duen transmedia proiektua baizik.

Hirugarren diskoa iragartzeko Hitzaurrea izeneko bideo enigmatikoa Sareratzerekin batera (Nitya Lopezek zuzendu du eta Iñaki Beraetxe aktoreak hartu du parte) jakinarazi dute Hemen Herensugeak Daude 2020 Tourrak izango dituen geltokiak.