Metalcore melodikoa egiten du Leitzako Katez taldeak. Seikotea 2014an elkartu zen eta gaur arte bi disko kaleratu ditu: 2015ean ‘Begi itsuak’ eta 2017an ‘Zain’. 2018an hasi ziren hirugarren lan luzeari forma ematen, eta 2021ean zehar argia ikusiko duela agindu dute. Fran Pérezek, Jonan Ordorikak eta Javier Arteagak masterizatua eta Eneko Celestinok ekoiztutako diskoa da, soinu digitala duena.

Mokadu gisara, ‘Argiz Iluntzen’ single homonimoa aurkeztu zuten 2020ko azaroan, eta orain bigarren kanta bat dakarte, bideoklip formatuan: ‘Aurpegia Biluztu’. Ander Azurmendi antzezlearen eta Jon Corres irudi arduradunaren laguntza izan dute ikus-entzunezkoa aurrera ateratzeko. Soinuaren arduradun Fran Pérez izan da Itxura Records estudioan, eta, horrez gainera, Jonan Ordorika eta Javier Arteagarekin batera aritu da masterizazio lanetan.